Eibarko hainbat musikarik bat egin dute Zaldibarko zabortegian gertatutakoa —bi langile desagerturik daude otsailaren 6an izandako luiziaren ondorioz— argitzeko eskaerarekin eta abesti bat sortu eta grabatu dute. “Zaborrezko munstroa” du izenburu abestiak, Kokein taldeak eta Miren Narbaizak (MICE) sortu dute musika eta Txakur Gorria kolektiboak jarri dizkio hitzak. Abestiaren grabazioan, aipatutakoez gain, Maite Arroitajauregik (Mursego). Aitor Gorosabelek (Su Ta Gar), David Karbak eta Jokin Bergarak ere hartu dute parte, besteak beste. Jarraian ikus dezakezu abestiarekin egindako bideoklipa.
Horrela dio kantuak:
Zaborrezko munstroak oka egin digu, gauak dira suzkoak gezurra ari du.
Nondik dator usaina? Zenbat hitz karratu… Ez da arriskurik baina, leihoak zarratu.
Herriak erantzunak, erantzukizunak behar ditu Zaldibar argitu!
Gorbata mugimendu aberats poseak, miseria sortzen du botere goseak.
Sortu dugun pozoia datorkigu bueltan, ez da kabitzen lohia alfonbra azpietan.
Herriak Joaquin, Alberto gertuko, etxeko behar ditu Zaldibar argitu!
Bizitza omen zen handiena baina agian ez guztiena.
Herriak erantzunak, erantzukizunak, Joaquin, Alberto gertuko, etxeko behar ditu Zaldibar argitu!
