Udazkenerako 25 disko

Agur esan diogu udari eta udazkenean sartu gara dagoeneko. Urtero bezala, disko argitalpenak ugaritu egingo dira datozen asteetan, abendu hasiera bitartean, Durangoko Liburu eta Disko Azokan egoteko. Orain arte iragarritako diskoen artean hautaketa bat egin dugu.

ANEGURIA—Percebe, dana edo ezebez (Baga Biga)
Azkue Fundazioak antolatutako Lehien Banda irabazi zuen Bilboko rap abeslariak iaz, eta horren sari gisa diskoa argitaratuko du irailean Baga Biga diskoetxearen eskutik. Aneguriak aurten kaleratzen duen bigarren diskoa izango da, uda aurretik Frambuesas y Palomitas argitaratu baitzuen. Entzun “Non zaude (remix)”. Argitaratze data: irailak 26

BENITO LERTXUNDI — Ospakizun gauean (Kantaita Enea Records)
Oroimenaren oraina kaleratu zuenetik sei urtera, lan berria dakar Benito Lertxundik. Ibilbide osoan lagun izan duen Elkar diskoetxea eta bere zigiluaren bidez plazaratuko du Ospakizun gauean. “Kimu bat zuhaitzan” da aurrerapen abestia, Allan Rankin kanadarraren kantu baten euskarazko moldaketa. Argitaratze data: urriak 5

BUFFALO — Ulu (Egilea editore)
Zarauzko hirukoteak elkarrekin joaz grabatu du bere hirugarren diskoa, “interakzio eta dinamika ezberdinek osatutako abestien energia behar bezala islatzeko”. Halaber, lehen diskoetako funk nahiz jazz doinuek post rock instrumentalari utzi diote tokia lan berria. Argitaratze data: irailak 14. Entzun hemen

EÑAUT ELORRIETA — Harian (Elkar)
Kaabestri String Ensemble hari boskotearekin igoko da Eñaut Elorrieta eszenatokietara udazken honetan, bira berezia egiteko asmoz. Biraren promozioa egiteko lau kantu grabatu ditu David Chalminekin, baina formatu digitalean bakarrik zabalduko dira. Proiektu berri honen lehen kontzertua Bilboko Arriaga antzokian emango du, urriaren 28an. Argitaratze data: urriak 8

ERABATERA — Antipodetan (Egilea editore)
Gatibu taldeko Gaizka Salazar bateria jotzaileak sorturiko proiektua da EraBatera. Mikel Caballero (baxua, Gatibu), Beñat Serna (gitarra, Ken Zazpi) eta Jurgi Ekiza (ahotsa, Willis Drummond) kideekin grabatu du diskoa, eta zuzenekoetarako Miguel Moyano (gitarra, Gari & Maldanbera) eta Josu Aginaga (teklatuak) batu zaizkie. Lehen aurkezpen kontzertuak data eta leku hauetan izango dira: azaroak 8, Bilboko Kafe Antzokia; azaroak 9, Donostiako Doka kafe antzokia; azaroak 29, Gasteizko Jimmy Jazz aretoa; azaroak 30, Baionako Le Magneto aretoa. Argitaratze data: irailak 20

ERASO! — Inoren lurretan (Egilea editore)
Kaiolatik ihes diskoarekin 20 urteko ibilbidea ospatu ondoren, sei abestiz osaturiko EP bat kaleratuko du Zarauzko metal taldeak. Lehen aldiz Eñaut Gaztañaga soinu teknikariarekin egin du lan taldeak, Zestoako Gaztain estudioan. Argitaratze data: urriak 1

ESKEAN KRISTÖ — Beste belaze batzuen gozoan (Egilea editore)
Arratiako rock&roll boskotea Cesar Ibarretxe soinu teknikari beteranoarekin grabatzen ari da bere hirugarren diskoa. Hainbat estudio erabiltzen ari da horretarako: bateria eta baxua Lorentzo Records-en grabatu ditu, gitarrak Gaua Produkzioak estudioan, ahotsak Doctor Deseoren entsegu lokalean… Aurreko bi lanak Baga Bigarekin argitaratu ondoren, autoekoizpenera jo du Eskean Kristök ere. Azaroaren 9an Igorreko Kiñu gaztetxean egingo du diskoaren lehen aurkezpena, eta abenduaren 20an Bilboko Kafe Antzokian aurkeztuko ditu kantu berriak. Argitaratze data: azaroa

ESNE BELTZA
Mark Dasousa ekoizle valentziarrarekin lan egin du Esne Beltzak disko berrian. Aspencat, Zoo, Smoking Souls eta beste hainbat talderekin lan egindakoa da Dasousa. Bi zatitan grabatu dute diskoa: lehenengoa Higain estudioan, Haritz Harreguyrekin, eta bigarrena Dasousaren Atomic estudioan, Alacanten (Herrialde Katalanak). Argitaratze data: zehaztu gabe

FALTA — FaltA #2 (Kulturaz)
Azpeitiko Kulturaz kooperatibak sustaturiko ArkupeHotsak ekimenaren laguntzaz grabatu du Faltak bere bigarren diskoa. Lehenengoaren aldean, “ezberdina da, gordinagoa… baina betiko errezeta hor da: post rock/grunge ispirituan, konpromisorik gabe“. Irailaren 21ean aurkeztuko du Azpeitian bertan, baina jada entzun dezakezue osorik Badok atarian. Argitaratze data: irailak 21

IGELAREN BANDA — Ur berri, urte berri (Elkar)
Gabon kantuek osatzen dute Bixente Martinezek gidaturiko jazz hirukotearen lan berria. Ahotsetan hainbat kolaborazio izan dituzte: Izaro, Natxo de Felipe, Maite Larburu, Maddi Oihenart, Mikel Urdangarin… Argitaratze data: azaroak 14

IZAKI GARDENAK — Dena oskol (Erraia)
Erraia zigilu berriaren lehen argitalpenetako bat izango da Gasteizko taldearen lan berria. Oraingoan Euskal Herritik kanpora jo du Jon Basagurenek gidaturiko taldeak eta Sevillako La Mina estudioan grabatu du bere laugarren diskoa. Argitaratze data: azaroak 29

Izaki Gardenak boskoteak Sevillan grabatu du disko berria.

JON GURRUTXAGA — Kateak (Gaztelupeko Hotsak-Lokatzetan Play)
Bi disko luze argitaratu ostean, formatu laburraren alde egin du oraingoan Elgoibarko musikariak. Lau abesti grabatu ditu Aieka estudioan, eta Gaztelupeko Hotsak zigiluak argitaratuko ditu Lokatzetan Play binilozko single bildumaren barruan. Entzun lanari izenburua ematen dion “Kateak” abestia. Argitaratze data: urriak 4

JOSEBA IRAZOKI ETA LAGUNAK
Berako musikaria Joanes Buff ekoizlearekin ari da grabatzen disko berria Atala estudioan. Ibai Gogortzak, Felix Buffek eta Jaime Nietok osatu dute oraingoan taldea, baina kolaborazioak ere izango dira, tartean Ager Insunzarena (Audience). Argitaratze data: zehaztu gabe

LEIHOTIKAN
Iruñeko taldeak ez du sekula presarik izan kantu berriak grabatzeko, eta orain ere sei urte igaro dira Harold argitaratu zuenetik. Tartean, Bonberenean grabaturiko zuzeneko diskoa kaleratu zuen 2014an. Irailean hasi da grabatzen lan berria K estudioan. Argitaratze data: zehaztu gabe

LURPEKARIAK — Itsasotik iturrira (Errabal Jazz)
Sei lagunek osatzen dute proiektu hau, eta hirukote bikoitz baten forma hartzen dute: bi bateria, bi kontrabaxu, ahotsa eta tronpeta. Ion Celestino (Broken Brothers Brass Band), Nerea Erbiti eta Ander Garcia daude taldekideen artean. Talde inprobisazioan oinarritzen dira, musika norabide anitzak hartzeko. Matana Roberts, Beñat Axiari, Steve Coleman edota Mikel Laboaren eragina aitortzen dute. Argitaratze data: zehaztu gabe

MADDI — Ying yang (Bonberenea Ekintzak)
Maddi Noguera buru duen taldeak lehen diskoa argitaratuko du. Karlos Osinagarekin grabatu dute Bonberenea estudioan eta hamar rock abesti sendo biltzen ditu. Bonberenean bertan aurkeztuko du zuzenean urriaren 6an. Argitaratze data: urriak 3

MADELEINE — Su hura (Egilea editore)
Donostiako laukotearen hirugarren diskoak Su hura du izenburu eta Gaztain estudioan grabatua izan da Eñaut Gaztañagarekin. Lehen aurkezpen datak hauek dira: irailak 28, Donostiako Guardetxea; urriak 6, Orio; urriak 7, Urretxu; urriak 12, Baionako Le Magneto; urriak 20, Urnietako Sarobe. Argitaratze data: irailak 21.

MCONAK — Gure naufragioak (Mauka)
Geldialdi luze baten ostean, Lekeitioko folk-rock taldeak aingura jaso du eta lan berri batekin bueltan da. Victor Sanchez soinu teknikariarekin hamar abesti grabatu ditu Higain estudioan. Argitaratze data: zehaztu gabe

MIKEL LABOA — Kutxa (Elkar)
Mikel Laboaren heriotzaren 10. urteurrenarekin bat eginez, haren disko guztiak biltzen dituen kutxa argitaratuko du Elkar diskoetxeak. Jose Luis Zumetak diseinatu du kutsa. Argitaratze data: azaroak 30

MODUS OPERANDI
Iñaki Ortiz de Villalba Betagarri taldeko abeslari ohiaren proiektu berria lehen diskoa ari da grabatzen Jagoba Ormaetxearen estudioan. Lauroba eta Vendetta taldeetan aritutako musikariak bildu ditu bere inguruan gasteiztarrak, oinarrian ska musika duen estilo fusio berria eskaintzeko. Argitaratze data: zehaztu gabe

MONTAUK — Geruzak (Erraia)
Erraia zigiluaren udazkeneko bigarren erreferentzia Gasteizko taldearen lan berria izango da. Norantza berriak hartu ditu Beñat Goitiak gidaturiko laukoteak, Gasteizko Gaztetxearen 30. urtemuga ospatzeko diskoan jasotako “Ctrl Alt Supr” abestiak erakusten duenez. Libek eta Jon Basagurenek kolaboratu dute diskoan. Argitaratze data: urriak 23

NØGEN — Liv til døden (Airaka)
Donostiako taldearen lehen disko luzea ere udazkenean iritsiko da, eta abenduaren 27an Donostiako Antzoki Zaharrean aurkeztuko du. Argitaratze data: urria

RUPER ORDORIKA — Bakarka (Elkar)
Izenburuak dioen bezala, beste inoren konpainiarik gabe grabatu du Ruper Ordorikak disko berria. Ahots eta gitarrarekin, bere errepertorio luzeari errepasoa eman dio, “kantuen esentzia bilatu nahiean”, Elkar diskoetxeak azaldu duenez. Azaroan emango ditu lehen aurkezpen kontzertuak: 9an, Zegaman; 16an, Zumarragan; 23an Tolosan; 25ean, Azpeitian; eta 30ean, Oiartzunen. Abenduaren 15ean eta 16an zuzeneko diskoa grabatuko du, taldearekin, Bilboko Kafe Antzokian. Argitaratze data: azaroak 8.

SONAKAY — Sonakay denontzat (No-CD Rekords)
Mikel Laboaren “Txoria txori” abestiaren flamenko bertsioari esker telebistako saio batean lortutako sonaren ondorioz, lehen diskoa grabatu du Donostiako taldeak. Zazpi kantuk osatzen dute diskoa, euskaraz eta gaztelaniaz abestutakoak, eta aipatutako bertsioaz gain, Benito Lertxundi, Pier Paul Berzaitz eta Urkoren kandu bana jaso dute. Argitaratze data: irailak 17.

SUAIA ETA AMA REBEL
Gorka Suaia buru duen reggae taldea A-Lone Ark Muzik estudioan ari da grabatzen lehen diskoa, Ibon Larruzea teknikariarekin. Argitaratze data: zehaztu gabe

WILLIS DRUMMOND
Urte hasieran Joseba Baleztenak taldea utzi zuenez geroztik, hirukote formatuan ari da Baionako taldea. Horren testigantza uzteko zuzeneko diskoa grabatuko du Donostiako Intxaurrondo Kultur Etxean, urriaren 13an. Irudietan ere jasoko dute kontzertua eta DVD batean argitaratuko. Argitaratze data: zehaztu gabe 

XABI BANDINI — Begibakar (Gor)
Kerobiako buru ohiak etxean grabaturiko lau kantu zabaldu zituen uda hasieran bere web orrian, udazkenean kaleratuko duen lanaren iragarpen gisa. Argitalpen data: urriak 5

ASKOREN ARTEAN — Joseba Sarrionandia. Gure oroitzapenak (Elkar)
Joseba Sarrionandiaren poema musikatuen bilduma zabala kaleratuko du Elkar diskoetxeak, liburu eta CD bikoitzeko formatuan. 32 kantuk osatzen dute bilduma, eta Mikel Laboa, Ruper Ordorika eta bestelako klasikoez gain, oraingo eszena berriko hainbat kantari eta taldek ere parte hartu dute, grabaketa berriak ekarrita: Eñaut Elorrieta, Fermin Muguruza, Joseba Irazoki, Anari, Audience, Mursego, Zea Mays, Berri Txarrak, Amorante, Ken Zazpi, Izaki Gardenak, Libe, MICE, Rafa Rueda, Mikel Urdangarin, Igor Arzuaga, Gose, Iñigo Muguruza eta Andoni Basterretxea (Delirium Tremens). Argitaratze data: azaroak 21