Skakeitan taldeak azken bira bat egingo du agur esateko

Hamalau urteko ibilbidearen ondoren, Skakeitan taldeak agur esatea erabaki du. “Maitasun istorio bat” izan dela azaldu du taldeak, baina “baikor eta irribarretsu” doa, “jada adostu baikenuen zer idatzi gure epilogoan, oraindik erraietatik ateratzen zaiguna eta bide honi amaiera emateko era onena: Asko maite gera”.

Skakeitanen hastapeneko argazki bat, taldeak bere Facebook orrian jarritakoa.

Desegitearen berri emateaz gain azken bideoklip bat plazaratu du gaur taldeak, Eman ez genuen kontzertua diskoan jasotako “112″ abestiarena. Halaber, agurtzeko bira bat egingo duela iragarri du, eta dei egin die zaleei: “emaiguzue dena, guk berdina egingo dugu”. Laster emango ditu taldeak ezagutzera birako datak eta lekuak, baina kontzertu horietako bat Herri Urratsen izango da, maiatzaren 8an, Nafarroa-Badok guneko eszenatokian. Halaber, datorren ostegunean, hilak 28, Gasteizko Kubik aretoan joko du.

Bost disko argitaratu ditu Skakeitan-ek 14 urte hauetan, eta ehundaka kontzertu eskaini ditu, horietako bat Manu Chaorekin batera Donostiako Zurriola hondartzan. Chaok berak taldearen “Lerro hutsen artean” abestian kolaboratu zuen.