Rafa Ruedak ezohiko kontzertua eskaini zuen iazko urriaren 24an Donostiako Viktoria Eugenia antzokian. Egun batzuk lehenago Mungian (Bizkaia) egin bezala, Euskeria Abesbatzak lagundu zion kantari eta musikariari Rueda (Zart, 2020) izeneko diskoaren jendaurreko aurkezpenean. Ruedak halaber, taldekide berriez inguraturik jardun zuen: Jaime Nieto (baxua eta teklatuak), Alvaro Olaetxea (bateria, perkusioa eta elektronika) eta Koldo Uriarte (teklatuak). Horrez gain, Mikel Urdangarinek abesti batean pare hartu zuen.
Rafa Rueda eta taldekideak, atzean Euskeria Abesbatza dutela, Viktoria Eugenia antzokian.
Emanaldi zirraragarri haren lagin bat jasotzen duen bideoklipa estreinatu dugu gaur BADOKen. “Neguko langileak” abestiaren interpretazioa jasotzen du ikus-entzunezkoak. Josu Goikoetxearen Zer luzea negu hau (Elkar, 2018) poema liburuko olerki bati musika jarri dio Ruedak kanta horretan.
