Peru Galbeteren lan berriko “Ura” bideoklipa estreinatu dugu

Apirilaren 1ean ikusiko du argia Peru Galbete kantugilearen lan berriak. Beiratu izenburua du eta hamabi kantuez osatua dago. Dagoeneko aurresalmentan dago beren bandcamp plataforman. Lan horretako “Ura” abestiaren bideoklipa estreinatu dugu gaur. Hitzak eta doinua Galbeterenak dira, baina Paxkal Irigoienek kolaboratu du saxofoiarekin eta ekoizpenean.

Peru Galbeteren laugarren diskoa da Beiratu, eta egilearen hitzetan, lan berri honek “bizitzari begietara begiratu (edo beiratu)” nahi dio, “beiratzea ere badelako gauza bati beiraren ezaugarri edo itxura ematea, eder mantendu dadin (nahiz eta hauskor). Eta ezinbestean, bizitzari berniz kapa bat eman ohi diogu (hondatu ez dadin agian) diskoaren azaleko egurrek dutenaren antzekoa”.