Musikualdia: hiru eguneko egitaraua Urretxu-Zumarragan

Beste urte batez, Urretxu-Zumarragako (Gipuzkoa) hainbat kolektibok indarrak batu dituzte Gabonetan Musikualdia antolatzeko. Hiru jaialdik osatuko dute aurtengo musika egitarau oparoa, abenduaren 26tik 28ra bitartean: Sortu Dira Besteak, Kubeats eta Mukuru Festa, hurrenez hurren.

Hiru egunetan 18 talde eta bakarlari entzuteko parada.

Sortu Dira Besteak jaialdia KKinzona eta Eltzekondo kolektiboek antolatzen dute bi urtez begin, “euskal ahots, kantakera, espresio-bide eta kantugile berriak erakusteko asmoz”. Iraganari eta etorkizunari begiratu beharrean, “euskal kantagintzaren oraina aldarrikatu” nahi dute antolatzaileek. Aurtengoa hirugarren ekitaldia da eta sei talde edo bakarlari bilduko ditu Zumarragako Zelai-Arizti aretoan: Bilau, MICE, Kalikotx, Ibon RG, Birkit eta Ertzak.

Kubeats jaialdiak “musika elektronikoak eskaintzen dituen aukera mugagabeen artean arakatuz gozatzeko” aukera eskaini nahi du. KaleGorrian kolektiboak antolatu du hirugarren urtez, Eltzekondo eta KKinzonaren laguntzarekin. Lau proposamen bilduko ditu abenduaren 27ko emanaldiak: Lumi, Echø, OLOR eta Miss Bihotza.

Mukuru Festa berriz, lehen aldiz ospatuko dute Mukuru kolektiboa osatzen duten kantari eta taldeek. 2017an sortu zuten Mukuru, beraien jarduna kolektibizatu nahirik proiektu ezberdinen bitartez. Festa honetan Mukuru zigilupean bi urteotan argitaratutako diskoez gain, bilduma berri bat argitaratuko da, talde bakoitzaren abesti banarekin. Egun osoko egitaraua antolatu dute abenduaren 28rako. Goizean, herriko kaleetan zehar, Peru Galbete, Iturria, Isuo ta Kezman eta Paxkal Irigoien ariko dira kantari. Arratsaldean, hainbat kontzertu hartuko ditu Gaztetxeak: 19:00etan, Hatxe eta Ekhi Lambert-ek joko dute, eta 23:00etatik aurrera Klak!son eta Txost! taldeek emango diote amaiera festari.