Mikel Urdangarin disko berria grabatzen hasi da
Mikel Urdangarin aste honetan hasi da disko berria grabatzen. Bi hilabete eman ditu diskoaren aurreprodukzioa lantzen Koldo Uriarte teklatu jolearekin. Uriarte bera arduratuko da diskoaren ekoizpenaz, eta hark esan duenez, “ausarta” izango da Urdangarinen lan berria. Izan ere, lehen aldiz pianoarekin konposatu ditu abesti berriak, eta ez gitarrarrekin, orain arte bezala. Zuzenean ere pianoarekin bakarka aritu da Urdangarin azken hilabeteetan —pandemiak hainbat kontzertu bertan behera utzi aurretik— eta halaxe arituko da urriaren 18an, Loraldia jaialdiaren barruan, Bilboko Euskalduna jauregian.
Mikel Urdangarinen bakarkako hamahirugarren diskoa izango da —zuzenekoak barne eta lan kolektiboak
(Bar Puerto, Zaharregia, txikiegia agian, Jainko txiki eta jostalari hura) kontuan hartu gabe—, eta ZART kolektiboak argitaratuko du. Disko berria zuzenean aurkezteko oraingoz iragarritako lehen emanaldia Orioko kiroldegian eskainiko du Urdangarinek, azaroaren 14an, eta ondoren Bilboko Kafe Antzokian bi kontzertu emango ditu, abenduaren 23an eta 26an.
