Manez proiektu berria aurkeztu du Thierry Biskarik
Bolbora, Hegalka, Kokin edota Kalakan taldeetan ibilitako Thierry Biskari kantariak bere proiektu berria aurkeztu du. Biskarik Manez goitizen artistikoa hartu du bere abestiak plazaratzeko. Iaz hainbat lekutan zuzenean aurkeztu ondoren, martxoaren 28an kaleratuko du Kobreak metalezko haize tresnen taldearekin grabaturiko lehen diskoa, Manez eta Kobreak (Kalapita Produkzioak). Lanari hasiera ematen dion “Zapetagilea” abestia entzun dezakezue hemen.
Manez eta Kobreak (Ion Markel)
“Lekukotasun intimo bat” eskaintzen du Manezen lehen diskoak. Kantuen doinu guztiak Biskarik sortu ditu, baina hitzak osatzeko Jon Maia, Uxue Alberdi, Xabier Euzkitze, Aurelia Arkotxa edota Itxaro Bordarengana jo du. “Lurrarekin dudan harremana aipatzen dute kantu horiek”, azaldu du Biskarik, “errotu edo abiatu, joan eta aske izan edo egon eta betikotu. Halaber, besteekin dudan harremana galdezkatzen dut: komunitate baten parte izan edo bazter izan? Nere ezberdintasuna eta nortasuna nola onartu?”.
Ana Telletxea, Fermin Garaikoetxea Mintxo, Vianney Desplantes, Bixente Etxegarai eta Laura Etxegoihenek osatzen dute Kobreak. Taldearen musika tradizioan oinarritzen da eta aldi berean, doinu berrien freskotasuna eta txistukatzen diren kantuen bizitasuna dauka.
Martxoaren 28an Bilbon aurkeztuko du Manezek diskoa, eta ekaina bitartean beste hainbat emanaldi ditu hitzartuak. Hauek dira datak eta lekuak:
- martxoak 28: Basque Fest jaialdia (Bilbo)
- apirilak 5: Nafarroako Unibertsitateko Museoko Auditorioa (Iruñea)
- apirilak 7: Abadia jauregia (Hendaia)
- maiatzak 19 eta 20: Umore Azoka jaialdia (Lemoa)
- ekainak 16 eta 22: Festival de la Voix (Moissac, Frantzia)
- ekainak 21: Musikaren besta (Baiona)
