Maketa lehiaketa egingo du Herri Urratsek berriz ere
Musika maketen lehiaketa eginen du Herri Urrats-ek 2025ean, BERRIA eta Badok atariekin elkarlanean. Iaz abiatu zuten ekimena, eta berrogei taldek parte hartu zuten. “Euskaraz abesten duen talde orori irekia da”, antolatzaileen hiztean. Parte hartu nahi duenak hiru abesti bidali beharko ditu herriurrats@ikastola.eus helbidera. Talde irabazleak 2025eko Herri Urratsen jotzeko parada izanen du. Iaz, Muga Zero talde nafarrak irabazi zuen lehiaketa eta Herri Urratsen kontzertua emateko parada izan zuen.
2025eko Herri Urratsen aurkezpen prentsaurrekoa, Baionan. PATXI BELTZAIZ
Parte hartzeko baldintzak, hemen.
2025eko Herri Urratsen kantua Aguraingo (Araba) Dupla taldeak eginen du. Ikastolen aldeko jaialdian egin zuten Ipar Euskal Herrian jo zuten lehen kontzertua, Koldo Rodriguez Herri Urratseko kideak esplikatu duenez, eta ordutik etengabe aritu dira hiru lurraldeetan. Jadanik hasiak dira abestia eta bideoklipa lantzen, eta prestaketa lanetarako Etxepare lizeoko ikasleekin, Seaskako sortzaileekin eta Herri Urratseko antolakuntza taldearekin aritu dira, bizipen eta ideia horietatik abiatzeko sorkuntza lana. Martxo hasierarako aurkeztu beharko lukete.
2025eko Herri Urrats Senpereko Kattalin Elizalde kolegioaren handitze lanak ordaintzeko aurreikusia zuten; egoerak hala eskatuta, Arberoa ikastola laguntzeko ere izanen da. Maiatzaren 11n eginen dute, Senpereko aintziran.
Horrez gain, urtero bezala ekitaldi andana izanen dira Herri Urrats aitzineko giroa berotzeko. Bertso saio bat iragarriko dute aurki, eta Go!azen telesailaren urteko azken atalaren estreina eginen dute otsailean, aktoreekin batera. Urteroko zozketa ere antolatuko dute. Azkenik, herriurrats.eus webgunea ere martxan jarriko dute, Herri Urratseko materiala online erosi ahal izateko.
