Baga-Bigak argitaratuko du Hesianen disko berria

Hesian hil honetan hasiko da disko berria grabatzen. Sakanako taldearen seigarren diskoa izango da, baina Baga-Biga diskoetxearekin argitaratzen duen lehenengoa. Aurreko diskoak —Maite dugu (2007), Herriaren oihua (2008), Borrokatu eta irabazi (2010), Hitzetik (2011) eta Zuzenean. Hemen eta orain (2012)— autoekoizpenaren bidez edo Gor eta Oihuka diskoetxeekin kaleratu ditu Hesianek.

Hesian taldea.

“Lan-maketa entzun ondoren, disko bizkorra, indartsua eta melodiaz jositakoa etorriko dela ziurtatu dezakegu”, adierazi du Baga-Bigak. Taldeak berriz, Twitterren aurreratu du abesti berriek “aldaketa” dakartzatela, “taldearen esentzia galdu gabe”. Uztailean grabatu ondoren, urrian ikusiko du argia Hesianen diskoak.

Bitartean, punk-rock melodikoko taldea zuzenean ikusteko aukera bat baino gehiago egongo da udan. Hurrengoa, ostiral honetan, uztailak 4, Elgetako plazan (Gipuzkoa).

https://www.youtube.com/watch?v=yaskFVwzUAU