Hona hemen noizbait hunkitu nauten kantu batzuk. Haien bidez une atseginez gozatu dut eta gozatzen dut, eta entzuten ditudanean oroitzapen gozoak etortzen zaizkit. Doinuak, giroak eta mezuak, eta egileen jarrera, etorria, gatza eta piperra, eta garaian garaiko joera nagusiak kontuan izanik bide berriak edo desberdinak bilatzeko ausardia, gogoa eta lana azpimarratu nahi dut.
"Ehun ginen" (M-ak)
80ko hamarkadan M-ak taldea eredu bat izan zen gutako askorentzat. Rock, funk, rap, hardcore eta beste hainbat estilo landu zituen. Aitzindariak, ausartak, berritzaileak, kantu eder ugari egin zituzten, besteak beste, Emeak eta arrak (1985) diskoan dagoen kantu hau.
"Kantatu nahi nuke" (Balerdi Balerdi)
Taldearen freskotasuna, bizipoza, ironia, askatasunaren aldeko aldarria, feeling-a, power pop, rock-and-roll zein mod ukituak eta kantu politak maite ditut. 1991n kaleratu zuten 10 hazbeteko diskoan dagoen abesti hau da horren guztiaren ispilua.
"Celosamente gordea" (Bap!)
Euskal Herriko hardcore inguruko talderik handiena. Ziur aski jendaurrean jotzen gehien ikusi dudan taldea. Hasieran punk doinuak jotzen zituzten, baina beren ibilbidean hardcorea eta beste zenbait erritmo ere landu zituzten. Zuria beltzez (1992) diskoa aparta da, mugarri bat izan da beren ibilbidean. Disko horretan dago kantu hau.
"Bizitza nola badoan" (Xabier Montoia)
Xabier Montoiaren fan bat naizela onartzen dut. Egin duen ia guztia maite dut. Hamaika kantu eder sortu ditu, bakarlari gisa kaleratu zuen Beti oporretan (1995) lehen diskoan dagoen kantu hau esaterako.
"Bi itzal" (Deabruak Teilatuetan)
Indarra, kemena, grina, bizitasuna, erritmo azkarrak, melodia politak eta beste hainbat ezaugarri dituzte Deabruak Teilatuetan taldearen kantuek. Itsumutugor (1995) beren lehen diskoko kantu bat hautatu dut.
"Sortu eta haztea" (Dut)
Hardcorearen enborretik adar berriak bilatu eta landu zituzten. Energia handia, intentsitatea, iluntasuna, doinu trinkoa, hitz gordinak... 1996an kaleratu zuten At diskoan aurki daiteke kantu hau.
"Hitz jarioa" (Petti)
Petti abeslari, gitarrista eta musikagile handia da. Bere kantuek blues, rock eta folk kutsuak dituzte, baina Pettik bere jotzeko estiloa dauka, bere nortasuna, eta bihotz handia. Erraietatik ateratzen zaio aski ezaguna den bere ahots urratua eta sakona, batzuetan indar handiarekin eta beste batzuetan leun eta gozo. Etxeko Uzta taldearekin 2002an kaleratu zuen diskoan dago abesti hau.
"Batzuek ixo" (Joseba Irazoki)
Joseba Irazoki artista bat da. Musikari aparta, jakin-min eta irudimen handia du, eta sentitzen duen bezala jotzen du, aske, lotsarik edo konplexurik gabe, eta bide berriak arakatzen oso ongi pasatzen duela nabarmena da. Rock, folk, blues eta psikodelia aireak suma daitezke bere kantuetan, nostalgia, malenkonia. 2010ean kaleratu zuen Euria ari du diskoko kantu bat hautatu dut.
"Not paradise" (Glaukoma)
Urte gutxitan arrakasta handia lortu dute eta beren emanaldietara jende ugari joaten da. Ez da harritzekoa, reggae, rap, dancehall eta beste hainbat estilo ederki eta modu naturalean uztartzen dituzte, erraz, eta taldekideen etorria nabarmena da. 2012an argitaratu zuten Vol.1 lehen diskoan entzun daiteke kantu hau.
"Matxiruloaren ATXimurra" (Eten)
Musika baino gehiago jarrera bat da, adierazteko modu bat. Hardcore pieza gordinak eta bortitzak, energia erauntsiak, zaratak, eromena, errepikapenak, oihuak eta ohiko kantuen eskema jakinen suntsiketa saioak. Beren piezek dardarazi egiten naute, bizkortu. Azken aldian, gehien harritu nauen lana da Atx! (2015). Disko horretan dago abesti frenetiko hau.
"Bizikleta bat Txinan" (Jupiter Jon)
Rock, post punk, doinu eta erritmo afrikarrak eta beste hainbat musika mota uztartzen dituzte. Pleistozenoko astelehenak (2011) lehenengo diskoarekin harritu egin gintuzten eta Eta metaforak greba egin zeben (2015) bigarren diskoarekin urrats bat aurrera egin dute. Azken disko horretan dagoen kantu bat aukeratu dut.
"Amaiera" (Perlak)
Nire ustez, azken aldian sortu den talde interesgarrienetako bat. Kantuetan 80ko hamarkadako post punk giro iradokitzailea, malenkoniatsua suma daiteke. Bere lehen diskoa ederra da, eta, bide beretik osatua, 2016an plazaratu duen bigarrena osoagoa. Horren adibide, kantu hau.
