Gariren Eguzki berritan zaude diskoak 20 urte beteko ditu laister. Buruz ikasi nuen disko hura nire lehen autoarekin kilometroak egiten hasi nintzenean. Seat 600 bat, burdin hutsa. Casio bat nuen kopilotoaren eserlekuan eta TDK batzuk, besterik ez.
Zure Ford Escort hartan bestelako musika entzuten genuen beti, amerikarra, movidakoa… Urteak eman nituen euskal musika entzun gabe. Negu Gorriak-en "Geurea da garaipena" ere galdu izan nuen!
Hura agertu zenera arte. Tomás San Miguelen diskoak ditut gogoan edozein mendira igo eta urrunean dudanari so egitean diodanean. Eskutik helduta dator Bide Ertzeanen Maite out eta diskoa zabaltzen duen "Berriz berpiztu naiz", Seat Ibiza urdin hartan A-68a gora eta behera, Ruper Ordorikaren "Zaldiak negarrez"-ekin batera, bi ahotsetara, ozen, leihoak beheraino eta abiadura bizian. Gurea izan zen Berri Txarrak-en "Bueltatzen" ere, eta horrela ibili ginen urteetan.
Markos Untzetaren "Elektrizitatea teilatuetan" abestiak impasse bat markatzen du, Mandoileken "Joan eta etorri"-k apurtzen duenera arte.
Orduan itsasora bueltatzen naiz berriz, herrira. Bertan Josu Bergara topatzen dut Mikele Landarekin batera, "Inoiz"; eta kostaldeko marra jarraituz, Keu Agirretxearen "Bakoitzean". Eta guztiak forma hartzen du oraingoan. Zu agertzen zara eta zurekin batera nire betiko Benito Lertxundi. Gu, "Itsasoari begira", eta bertan, iparra.
Eta orain, jo dezatela mila kantuk gure Caddyetan…
