Mihise taldearen lehen singlea estreinatu dugu

Mihise taldearen lehen diskoa ezagutzen hasi gara gaur. Usurbilgo (Gipuzkoa) hirukoteak Kronik@ izenburuko lana plazaratuko du datozen egunetan eta bertatik ateratako singlea estreinatu dugu gau, “Besterik ez” abestia. Hemen entzun dezakezu.

Mikel Olasagasti + Beñat Urteaga + Antton Aranburu = Mihise. (Ibai Arrieta)

Mikel Olasagatik (bateria), Beñat Urteagak (baxua eta ahotsa) eta Antton Aranburuk (gitarra eta ahotsa) osatzen dute Mihise —hirurak Hotzikara taldean aritutakoak dira eta Urteaga eta Aranburu Izeberg taldeko kideak ere badira—. 2019ko uztailean eman zuen hirukoteak lehen kontzertua eta abenduan Berako Atala estudioan sartu zen diskoa grabatzera. Apirilaren 23an argitaratzeko asmoa zuen, baina COVID-19ak eragindako itxialdiaren ondorioz, atzeratu behar izan dute diskoaren kaleratzea.

Kronik@-k hamar abesti biltzen ditu eta “disko kontzeptualen markoa” du, Imanol Ubeda musikariak (Bide Ertzean, Don Inorrez) diskoaren promozio orrian idatzi duenez. “Erritmo jostariak eta hard kutsuko armoniak, taupadak hipnotikoak eta pasarte aratzak, geruza ilunak eta ostarte melodikoak, teklatuen psikodelia eta noise gitarrak… Polikromia bat oihan beltzean”, azaldu du Ubedak.

Hainbat musika talde biltzen dituen Balio Dute kolektiboaren zigilua darama Mihiseren lehen diskoak.