Lisabök disko berria kaleratuko du bihar

Lisabö taldeak disko berria kaleratuko du bihar, abenduak 1, Bidehuts zigiluak iragarri duenez. Eta edertasunaren lorratzetan biluztu ginen du izenburu diskoak, eta bihar eguerditik aurrera Rockdelux aldizkariaren web orrian entzun ahal izango da osorik. Durangoko Azokan egingo da salgai, abenduaren 5etik 9ra arte, CD eta LP formatuetan, eta ondoren Bidehutsen webean zein disko dendetan. Lan berriak zazpi abesti biltzen ditu eta ohikoa denez, Martxel Mariskalek idatzi ditu kantuen hitzak.

Lisabören disko berria grabatu duten musikariak. (Galder Izagirre)

Zazpi urte pasa dira Lisabören azken lana kaleratu zenetik eta denborak aldaketak ekarri ditu beste behin formaziora. Ivan Zabalegik eta Joseba Poncek taldea utzi zuten eta diskoa grabatzeko Aida Torres aritu da baterian, eta ohikoa denez Maite Arroitajauregik biolontxeloa jo du. Oraindik zehazteke dauden aurkezpen kontzertuetarako aldiz, Karlos Osinaga, Javi Manterola, Xabi Zabala eta Eneko Aranzasti taldekideei Borja Toval (Sacco) eta Sergio Gonzalez (Izaera, Sorkun…) gehituko zaizkie.

Disko berriaren azala.