Gelditu hor
Zatoz, bihurtzera lo
ezinak nagi
mamuak izara eta
hitzak haragi.
Tori, zilbor laurden bat
ia ilgoran
arrakala bat egin
nahian denboran.
Barne zingira, haran,
baso, ordeka…
jolastu nahi al duzu
gorde-gordeka?
Bi betazalak izu,
desegonkor.
Min ematen badizu
ez egon hor.
Zatoz, gordeleku bat
dut bizkarrean
doana munduaren
kontrakarrean.
Imajinatu zaitut
arnas -kantuka
nire gorputz gainean
erdi katuka.
Haztamuka jarraitu
dut atzaparka,
inoiz baino ederrago
zaude dardarka.
Gaur tristura darizu,
desegonkor.
Min ematen badizu
ez egon hor.
Zatoz, utzi egunari
gaua orbaintzen
ez dakit ziur lehen den
edo orain zen.
Iluna hain laiotza
izango zenik…
Heldu banizu eta
heldu bazenit…
Beti horren zauri zu,
desegonkor.
On egiten badizu
gelditu hor.
