Pantailak
Orduari begira,
zein ordu den jakin gabe bizi gara,
herri honetan
non egiak hainbat janzkera dituen
biluzik badago ere.
Errepikapena legea da,
denbora antzu bihurtu dugulako
pantailen atzean izkutaturik,
munduaren kontrako harresian bailiran.
Eta hitzak baditut
pozoi honi izena emateko,
baina irteera bat aurkitzear nago.
Faltsukeria
eguneroko ogia, begia begiaren truk,
bakoitzaren kaka eta ohorea defendatuz,
usaina aditu gabe.
Eta hitzak baditut mamu honi
garrasi egiteko,
baina adorerik izango al dut
aulki honetatik
altxatzeko?
