Isiltasuna

Lehen paradisuko zelai zabal haietan
kantari zebiltzen libertatearen semeak,
polborazko loreak eskuetan
eta buruan fantasia mugarik gabeak.

Isilik daude harriak
isil-isilik udazken guztia.
Isilik garrasirik latzenak
isilik arrano goitarra
eta zezenaren marrua…
Isilik…

Paradisu desiatu hartako zelaietan
ximeldu ziren loreak
eta legortu belar gozoak,
belar gozoen zuztar
usain eta landareak…

Isilik daude harriak
isil-isilik udazken guztia.
Isilik garrasirik latzenak
isilik…

Baina otsoak pasa zirenean,
gero pasa ziren
azeri eta zakur amorratuak.

Isilik daude harriak
isil-isilik udazken guztia.
Isilik garrasirik latzenak
isilik arrano goitarra
eta zezenaren marrua…

Isilik daude harriak
isilik etxe, Haizea eta kaleak,
isil-isilik daude berriro
gauza guztiak udazkenean.
Isilik.